milenicinja.mk » Раси на мачки » Бирманска Мачка

Бирманска мачка

  • Категорија: Категорија 2 - (Долговлакнести)
  • Други имиња: Birman cat / Свети Бирман, Светата мачка од Бурма
  • Крзно: долго, свиленкасто, густа грива на вратот, малку виткани влакна на стомакот
  • Очи: округли, длабоки, јасно сини
  • Други карактеристики: предниот дел на шепите е бел (шепите изгледаат како ракавици со пресечени прсти)
  • Грижа: релативно лесна; редовно четкаше и чешлање
  • Темперамент: љубезна, индивидуалист, многу верна
  • Земја на потекло: Бурма; Франција
  • Форум за Бирманска мачка

Земја на потекло - историјат

Бирманската мачка, според карактерот, градбата и изгледот на крзното, спаѓа некаде помеѓу сијамската и персиската мачка, а сепак е посебна раса која има и свои специфични карактеристики. Позната е и како светата мачка од Бурма.

Општ опис

Сите бирмански мачки имаат потемно крзно на ушите, лицето, опашката и нозете. Потемните делови од крзното на првата бирманска мачка биле во кафеаво-сивкаста боја (како на фоките), но денес тие делови можат да бидат и сини, лилави, чоколадно кафени и други кафеаво-бели шари кои наликуваат на шарата на оклопот на желките. Денес сите тие се сметаат за различен вид, но сите ги имаат сините очи, белите заби, потемните делови на ушите, лицето, нозете и опашката, истата градба на тело, како и слични карактерни особини.

Телото на бирманската мачка наликува на телото на персиската мачка, со набиени нозе и заоблена глава. Како и да е, телото и нозете се подолги од телото и нозете на персиската мачка. Телото е со среден раст и со тешки коски. Крзното е со средна должина, а влакното е свиленкасто. Имаат густа грива на вратот, а крзното на стомакот е малку виткано. Лицето е малку испакнато, а не сплескано, со прилично долго и право носе и јасно сини и округли очи кои се убаво раздалечени. Ушите се релативно големи и ниско поставени.

Уникатната карактеристика која ги прави овие мачки специфични е нивната шара на крзното на шепите. Шепите се симетрично обоени и тоа нозете и задниот дел од шепата се во темна боја, а предниот дел од шепата е бел и изгледаат како да имаат ракавици (попрецизно, ракавици со пресечени прсти). Стандардот за оваа раса вели дека белите делови треба да завршуваат во права линија преку шепата и да не преоѓаат преку зглобот на шепата или ногата. Белите делови на задните шепи се стеснуваат позади шепата и завршуваат точно под зглобот, а познати се како оклопни ракавици (англ. gauntlets) т.е. наликуваат на заштитните ракавици кои ги носеле витезите. Овие бели завршетоци се резултат на редок рецесивен ген, иако има многу легенди кои на поромантичен и поинтересен начин кажуваат како тие настанале.

Една легенда вели дека бирманската мачка настанала при еден напад на храмот во Бурма каде свештеникот со долга златна брада, кој ја чувал божицата Тсун Кјан Ксе, бил убиен. Белата мачка од храмот скокнала на телото на свештеникот и крзното и станало златно од светлината на божица, очите сафирни како очите на божицата, додека опашката и нозете ја попримиле бојата на бурманската почва, а шепите со кои мачката стоела на телото на свештеникот останале бели како симбол за чистота и невиност.

Посовремена приказна за потеклото на овие мачки датира од 1919 година од Франција. Две од привте оригинални бирмански мачки со кафеаво-сивкаста боја на потемните делови од телото им биле дадени на францускиот истражувач Август Павие и на англискиот мајор Гордон Расел. Мажјакот умрел при патувањето, но женката преживеала и се породила. Оваа матица најверојатно го претставува почетокот на размножувањето и одгледувањето на бирмански мачки во Франција во 1920 години кога во програмата биле внесени и сијамски мачки и двобојни персиски мачки.

Расата официјално била признаена во 1925 година во Европа, и во 1959 година во Америка.

Според карактерот, бирманските мачки наликуваат на периските мачки со доза од енергијата на сијамската мачка. Важат за многу верни, предани и дружељубиви миленици. Бирманските мачки се доста отпорни на болести, созреваат за околку седум месеци, а мајките гласат за многу внимателни.

Најава






Немате корисничко име, регистрирајте се.
прашајте др. ветеринар
изгубено-најдено