milenicinja.mk » Новости » Претставници на МЕПСО и Аквила поставиле платформи за Царскиот орел

Претставници на МЕПСО и Аквила поставиле платформи за Царскиот орел

Објавено: 20/апр/2018 во 00:30

Претставници на МЕПСО и Аквила поставиле платформи за Царскиот орел
Електромонтерите од МЕПСО заедно со членовите од здружението за заштита и зачувување на природата „Авбила“ од Кавадарци поставиле 10 нови платформи за вгнездување на Царски орел на далекувод кој ги поврзува електропреносните системи на Македонија и Србија. 

Станува збор за петта акција по ред во поставување на платформи од кои првата е во 2012 година. Секоја акција е вршена на различни далекуводи во преносната мрежа на МЕПСО, а до сега има поставено повеќе од 50 платформи. Истите претставуваат замена за природните гнезда. Најголем број од нив се поставени во областа на Овчеполе и Повардарие. 

Сите платформи се трајно поставени и не предизвикуваат никакви пречки во пренесување на електрична енергија. Поставувањето на платформи е дел од проектот за зачувување на овој вид птица на територија на Македонија финансиран од фондацијата „Rufford“ од Англија. Овој проект континуирано е спроведуван од здружението за зачувување на природата „Аквила“ од Кавадарци во соработка со МЕПСО и ЕВН Македонија. 

Инаку станува збор за Царски орел кој е загрозен вид и е во црвената листа на загрозени видови пред исчезнување на светско ниво. Овие птици кај нас се заштитени со закон бидејќи популацијата бележи благ пад на национално ниво. Сето тоа е последица на усмртување од електричен удар, труење и намалување на достапни извори на храна.


Коментари

Најава






Немате корисничко име, регистрирајте се.
прашајте др. ветеринар
изгубено-најдено