milenicinja.mk » Раси на кучиња » Германски Птичар Со Остро Крзно

Германски птичар со остро крзно

  • Стандарди: FCI група 7 (Ловци и Трагачи), Секција 1: Копнени птичари, #98
  • Класификација: куче придружник
  • Други имиња: German Pointer (wire-haired) / Deutsch Drahthaar
  • Земја на потекло: Германија
  • Животен век: 9 до 12 години
  • Темперамент: паметно, храбро, активно и дружељубиво
  • Висина: 56 – 67 см,
  • Бои: темнокафеава со бела
  • Форум за Германски птичар со остро крзно

Земја на потекло - историјат

Германскиот птичар со остро крзно е снаодлива раса на кучиња која е развиена во Германија во доцните 1880 години кога ловот на птици станал многу популарен меѓу средната класа. Ловџиите сакале да развијат кучиња кои ќе бидат сестрани, т.е. кучиња кои добро ќе следат траги, добро ќе го укажуваат, чуваат и враќаат пленот, и кои бестрашно ќе се спротистават на можните противници како на пример лисиците. Расата германски птичар со остро крзно се добила со вкрстување на обичниот птичар, грифонот и полското водно куче, а кучињата кои се добиле биле сето тоа што ловџиите посакувале. Острото крзно им овозможувало без проблем да се протнуваат низ грмушките и да пливаат во ладните реки. Оваа раса од американскиот кинолошки клуб била признаена во 1959 година. Денес, тие се најпопуларните ловџиски кучиња во Германија.

Тело

Германскиот птичар со остро крзно изгледа цврсто, мускулесто и горделиво. Грлото е долго, широко и малку закосено. Рамениците се закосени и мускулести. Грбот е кус, прав и цврст. Градите им се широки и длабоки. Слабината е мускулеста. Стомакот им е вовлечен навнатре. Имаат погусти веѓи со прави влакна, овални очи, високопоставени уши кои се со средна должина и висат крај образите, и опашка која се кастри и никогаш не се носи исправена.

Крзно

Крзното карактеристично за овие германски птичари е грубо, остро, со прави влакна и може да издржи различни временски услови. Бојата на крзното е темнокафеава со бело, при што темнокафеави се главата и ушите, а бели се рилката и може да има и бела вертикална линија на челото меѓу очите. Овие германски птичари имаат густо вантрешно крзно. Крзното е пократко на нозете и главата, но со погусти веѓи, брада и мустаќи. Малите кутриња се раѓаат со покусо крзно кое расте до соодветната должина како што кучето созрева. Германските птичари со остро крзно се митарат просечно.

Карактер

Германскиот птичар со остро крзно е паметно, храбро, активно и дружељубиво куче. Оваа раса се паметни кучиња кои се желни да учат што ги прави лесно подучливи. Пријателски се настроени и со луѓето и со животните. Како и да е, препорачливо е да ги социјализирате и дресирате навреме затоа што некои германски птичари помалите животни може да ги гледаат како плен. Исто така, некои вакви германски птичари не ги сакаат баш туѓинците. Тие се верни и храбри кучиња кои можете да ги издресирате да бидат одлични кучиња-чувари. Тие се и големи авантуристи и сакаат да се зафатени и раздвижени. Уживаат да работат за својот газда. Доколку не ги дресирате и тренирате правилно тие може да станат хиперактивни и деструктивни. Најсреќни се кога поминуваат што е можно повеќе време со фамилијата која го чува како домашно милениче.

Дресура

Дресирањето ќе биде лесно, затоа што овие кучиња се многу подучливи кучиња и сакаат да му удоволат на газдата. Како и да е, пристапот треба да биде доследен.

Неопходна грижа

Крзното на германскиот птичар со остро крзно треба да се четка редовно и вишокот коса помеѓу шепите да се стрижи. Бањајте ги само кога е неопходно.

Тренинг

Германските птичари со остро крзно ќе бидат добри домашни миленици за активни фамилии. Уживаат да пливаат. Раздвиженоста и вежбите се неопходни затоа што ова се ловџиски кучиња кои се енергични и сакаат да се зафатени и активни. Доколку сопственикот нема да ги носи на лов, ќе биде потребно да ги води на долги прошетки, како и да им остава време да се истрчаат и изнаиграат слободно (без да се вразни за ремен).

Заболувања

Овие кучиња се доста здрави кучиња, но некои се подложни на оние чести заболувања кај кучињата како разместување на колкот и зглобовите, инфекции на ушите и проблеми со очите.

Најава






Немате корисничко име, регистрирајте се.
прашајте др. ветеринар
изгубено-најдено